🐰🐰النهاردة ان شاء الله هنتكلم عن
امراض الارانب وتحصيناتها وعلاجها
...
🐇🐇أ- الارانب :
- معلومات عامة :
- افضل فصول السنة لعمل مشروع تربية الارانب هو فصل الشتاء لان الارانب محبة للبرد عن الحر , ودا مش معناه انها بتحب البرد الشديد لكن ع الاقل ميبقاش الجو حار .
- لحم الارانب من اللحوم البيور الممتازة جدا لان نسبة الدهون بها قليلة جدا .
- دايما الناس اللي بتحاول تبدا المشروع بتبداه في نهاية شهر 9 عشان بداية الخريف والجو البارد مقارنة بالصيف.
- تربية الارانب بتتقسم لقسمين : يا اما ناس بتربيها عشان تبيع النتاج كلحم او تكسر سلالات وتبيعها
- بتفصيل اكتر :
في ناس بتربي الارانب لحد الولادة وبعد الولادة بتربي النتاج لمدة شهرين او لحد ما توصل 1800 جم وبعدين تبيعها لحم الكيلو بـ 20 جنيه مثلا
او انها تستني لحد ما النتاج دي توصل 4 شهور او اكتر وتبقي قادرة علي الانتاج وتعشرها وتبيعها عشر السلاله الواحدة بـ 130 جنيه .
- مدة ولادة الأم من 28 لـ 31 يوم وغالبا بتبقي 30 يوم ( شهر واحد )
- الأم بتتعشر في نفس يوم الولادة (بعد الولادة بـ 12 ساعة )
- بنسيب الذكر مع الام لحد ما نسمع صرخة الجماع من الذكر( بينام ع جنبه بعد اكتمال الجماع وبيصرخ صرخة عاليه ) , وممكن نمسك الام للذكر لو مش عاوزة تقف , لكن لو عدينا يوم من الولادة , الام مش هترضي تقف للذكر تاني الا بعد 10 ايام ع الاقل .
- بنكرر التنطيط ( تكرار الجماع بين الذكر والانثي ) في اليوم اكثر من 3 او 4 مرات .
- في نظريات بتقول ان تكرار التنطيط دا له علاقة بزيادة اعداد المواليد في بطن الام
- لو الام عشرناها في نفس يوم الولادة مرة , يستحسن المرة اللي بعدها نسيبها 10 ايام راحة عشان متجيش فجأة ومتعشرش تاني وهيبقي السبب الاجهاد .
- الام اللي بتعشر في اغلب الاحيان بتبقي بترضع ولادها مدة 25 لـ 30 يوم وممكن نوصل الفترة دي لـ40 يوم لو الام مش عشر.
- الام ممكن تبتدي تتعشر من عمر 5 شهور فاكتر او ممكن في عمر اقل لو جسمها اكتر من 3 ونص كجم .
- الام ممكن نستعملها انها تنتج فترة سنتين لكن في المزارع غالبا بيستغلوها سنة واحدة وبعدين يبيعوها للاهالي ويجددوا سلالات تاني .
- الذكر الواحد ممكن يكفي من 5 لـ 10 امهات لتعشيرهم لكن يستحسن اننا يبقي عندنا اكتر من ذكر عشان لو الامهات ممسكتش بيبقي غالبا سببه الذكر .
- الامهات غالبا لو في ذكر جديد بيعشرها ممكن تضربه وممكن يخاف منها وميعرفش يعشرها لذلك يجب تغيير الذكور للامهات خاصة الذكور الجديدة .
- الام اللي فيها مشكلة دايما في انها تعشر بنغيرلها الذكر ونديها فيتامينات واملاح معدنية كتير واذا لم تصلح للعشار فترة شهر تستبعد من القطيع .
- الام بتاكل في الايام العادية حوالي 150 جم وحوالي 200 جم في حالة الرضاعة واذا كانت عشر وبترضع يستحسن ترك الاكل مفتوح امامها .
- الام قبل الولادة بخمس ايام او اقل بتبتدي تنتف شعر من جسمها عشان تهيئ مكان الولادة للنتاج الجديد .
- لو نتفت الام ومولدتش في خلال 5 ايام يبقي احنا قدام احتمالين : يا اما حمل كاذب ودي تستبعد من القطيع او انها عشر ومش قادرة تولد ودي بنديها 1 مل اوكسيتوسن لفتح الرحم وتسهيل الولادة .
- اهم ما يمكن فعله للنتاج الجديد بعد الولادة هو منع البرد عنهم لانه العامل الاساسي في موتهم .
- دايما بنلف قفص الولادة بقطعة صوف عشان نمنع السقعة عنهم خالص
- دايما الام بتشم ريحة النتاج الجديد وبتلحسهم وبتدافع عنهم لو حست بخطر جاي عليهم لدرجة انها ممكن هي اللي تقتلهم او تاكلهم خوفا عليهم .
- لو ام ماتت وهي لسه والدة وولادها لسه صغيرين متعودوش ع الاكل , بنحاول نغطي جسمهم بشعر اي واحدة والدة تانيه ومعاها عدد مواليد اقل عشان ترضعهم مع ولادها , ودايما بنعمل كده عشان لو شمت ريحة غريبة هتقتلهم .
- لو ماتت الام ومش لاقين ام تاني ترضعهم ممكن نجيبلهم لبن صناعي وندي كل واحد 5 مل في بقه مرتين تلاته في اليوم .
- الام لو بتاكل ولادها ممكن نقفل قفص الولادة عن الام ونفتحه مرتين في اليوم علي ما ترضع ولادها ونقفله تاني ونمسكها لحد ما تخلص .
- النتاج الجديد المفروض انهم وهما بيرضعوا انهم يتعلموا الاكل وغالبا بيبقي عمر 15 يوم من الولادة .
- في علف للنتاج اسمه علف تسمين وعلف للامهات اسمه مرضعات ومرضعات سوبر .
- وفي ناس بيستعملوا نوع علف واحد للاتنين .
- الام بتبدي تتجس من بعد 10 ايام من التنطيط ومتكونش اكلت خالص عشان المواليد في الجس بتختلط مع الزبل بتاع الام .
- الام تستطيع ان ترضع 6 -8 مواليد علي الاكثر واذا كان عدد المواليد اكثر يفضل وضعه مع ام اخري بعد ملأه بشعر الام الاخري او ترضيعه صناعيا كي لا يموت شئ من النتاج .
- الجس المفروض يبقي بعد 10 ايام من التنطيط ولحد 14 يوم فقط , قبل كده ممكن نقتل المواليد وبعد كده ممكن نضغط عليهم ونموتهم الا لو كبروا خالص بقي .
- عشان نتعلم الجس بنقعد الارنب علي المؤخرة بتاعته ونحط ايدينا من تحت ونبتدي نحس المواليد دي بتبقي عاملة زي البلي الصغير وممكن كمان نعدهم لو بقينا شاطرين في الجس.
- غالبا بنجس الام اللي ولدت بعد الولادة ليكون متبقي منها ولد لسه منزلش ولو فعلا لقينا حاجة تاني , بنلاقي الام بتقطع اكل ومش مرتاحة لحد
- بنفرق دايما بين الذكور والاناث من فتحة المجمع , في الذكور دائرية وبيخرج منها بروز عند الضغط عليها , والاناث بيضاوية الشكل .
- اخطر امراض الارانب بعد الفطام هو مرض الكلوستريديا
- اخطر امراض الامهات والذكور هو الباستريلا وهو عبارة عن بلل اسفل الفم الي جانب الكخة او عدم القدرة علي التنفس وعلاجه .
- دايما شائع عند المربيين ان الارانب بتموت من الحسد , طبعا الحسد عامل يكفي لوحده بس مش كل حاجة نعزيها للحسد , ولكن سبب موت الارانب هو الخوف الشديد وليس الحسد .
- الارانب لا يفضل تربيتها الا في بطاريات , ولكل ام قفص مستقل بها به علافة ونبل خاص بها للشرب وقفص ولادة يركب اثناء الثلث الاخير من الحمل ويمكن تركه دائما في البطارية ولكن ينظف اولا باول .
- النتاج لهم بطاريات خاصة للتسمين .
- التحصينات :
1- (تحصين الكلوسترديا ( النفاخ:
- يتم تحصينها عند الفطام 1 سم تحت الجلد ويتم ذلك مره واحده فى العمر .
- عند تحصين الارانب الكبيره او فى سن غير سن الفطام يتم اعطاء 2 سم تحت الجلد ويكرر كل 6 شهور من السنه .
- فى حاله الاصابه بالمرض يتم التحصين كعلاج لانه يؤدى الى تقليل النافق وهو أفضل من استخدام المضادات الحيويه كعلاج .
- في حالة الاصابة بالكلوستريديا
- من اعراض الاصابة بالكلوستريديا هي الموت المفاجئ في الامهات الكبيرة بدون ظهور اي اعراض
- عند التشريح نجد الامعاء منتفخة انتفاخ شديد .
2- تحصين التسمم الدموى البكتيرى :
- يتم التحصين ابتداء من عمر شهرين بالتحصين الفورمالينى ( شركه العباسيه ) بجرعه 1سم تحت الجلد وايضا ممكن تحصين الارانب الكبيره 2 سم تحت الجلد ويتم تكرار التحصين كل 3 شهور وبصفه مستمره خلال السنه ويفضل ان يتم فى شهر 3 و 6 و 9 و 12 .
3- تحصين التسمم الدموى الفيروسى :
- يتم تحصينه ابتداء من عمر 2 الى 3 شهور بواقع 0.5 سم تحت الجلد للارانب الصغيره او الكبيره و يتم تكرار التحصين بصوره دوريه خلال السنه وبانتظام.
- فى مصر هناك نوعان من تحصين التسمم الدموى الفيروسى :
- التحصين المصرى انتاج شركه العباسيه ويتم تكراره كل 6 شهور ويفضل التحصين فى شهر 6 وشهر 12
التحصين المستورد ( الاسبانى ) شركه الغنام ويتم تكراره كل سنه .
......
• ممنوع استعمال اى مضاد حيوى قبل او بعد التحصين البكتيرى ب 3 ايام.
• ترج الزجاجة جيدا قبل واثناء التحصين لضمان مزج اللقاح.
• يجب ان تكون الارانب فى صحة جيدة ولا تعانى من اى امراض عند التحصين .
• جميع التحصينات تحقن تحت الجلد فى الجزء الخلفى لمنطقة الرقبة ولا تحقن فى العضل.
• يحفظ اللقاح بعيدا عن ضوء الشمس المباشر فى درجة 4 _ 8 وعدم التجميد يعني مبيتحطش في الفريزر ( علي الرف في التلاجة بس )
• لا تذبح الارانب قبل 4 اسابيع من اخر تحصين .
- الامهات العشار وبعد الولادة :
- يتم حقن كل ام 3 سم كالسيوم مثل ( كالماديكس – كوفاكالسيوم – كالبورماج ) تحت الجلد وذلك لتلافى الكساح الذى يحدث عند او بعد الولاده نتيجه نقص الكالسيوم فى الارانب , وأيضا بسبب ضعف الأم وعدم قدرتها علي الرضاعة والحمل في نفس الوقت .
- يتم حقن الام 1 سم اوكسى تتراسيكلين طويل المفعول تحت الجلد للوقايه من اصابات الرحم وايضا لمنع حدوث أى امراض للامهات
- الارانب عند الفطام ::
- عند الفطام يتم تصويم الارانب لمده 24 ساعه لتلافى حدوث ما يطلق عليه صدمه الفطام والتى تسبب انتفاخات واسهالات ونافق عالى فى الارانب المفطومه .
2- اعطاء تحصين الكلوسترديا.
3- تنزيل اى مضاد حيوى معوى فى ماء الشرب ولمده 3 ايام متتاليه للوقايه من الاسهالات التى تحدث فى هذه الفترة من العمر :
الذكور ::
* يتم حقن كل ارنب 0.5 مل فيتاسلين تحت الجلد مره كل شهر لزياده معدلات الخصوبه والقوه الجنسيه للذكور
- التطهير :
- كل شهر يتم تطهير وغسل البطاريات بأى مطهرمثل البيوتوكس 1مل لكل1 لتر فى حاله عدم وجود الارانب وذلك للوقايه من الجرب والاصابه بالطفيليات الخارجيه مثل الفاش والقمل وغيرها .
- كل شهر يتم تطهير البطاريات ب الاتى :
اليود بمعدل من 5 الى 10 مل لكل لتر كمطهر في حالة وجود الارانب .
- رش اى مطهر مثل اليود بمعدل 0.5 سم لكل لتر على هواء العنبر لتقليل نسبه الاصابه بالامرض ومن الممكن ان يتم ذلك مره كل اسبوع الى 10 ايام.
- ايضا يتم حقن الارانب بالايفوماك مره كل 45 الى 60 يوم للوقايه من الجرب والاصابه بالطفيليات الداخليه مثل الديدان , وتكون اول مره في سن الفطام للنتاج الجديد .
بالنسبة لمرض تصمغ الاذن او الجرب يمكن علاجه بحقن الايفرمكتين مع غسل الاذن بماء اكسجين ونشيل التصمغ من الاذن خالص
- الفيتامينات والاملاح المعدنيه : :
* ويتم وضعه مره كل شهر 3 ايام متتاليه :
- فيتامين هـ + سيلينيوم بمعدل 2 مل لكل لتر او حسب التركيز ويفضل ان يكون تركيزه عالى .
..
- فيتامين اد3هـ بمعدل 2 مل لكل لتر او حسب تركيزه ونوعه.
..
- املاح معدنيه سائله بمعدل 2 مل لكل لتر حسب نوعها وتركيزاتها.
..
وتفيد فى منع الاصابه بامراض نقص الفيتامينات والاملاح زياده معدلات الخصوبه فى الامهات والذكور وايضا كفاتح للشهيه وزياده معدلات استهلاك العلف وكمنشط للنمو .
- السموم الفطريه :
* يتم تنزيل جرعه من مضادات السموم مره كل اسبوع الى 10 ايام للوقايه من السموم الفطرية
المركزالبيطري
الأرانب ،تحصينات الأرانب ،أمراض الأرانب
إرسال تعليق