✍لو حضرتك دخلت كتكوت كويس جدا عند الاستقبال ولكن لقيت مع الوقت ان سحب العلف والوزن اقل من القياسي بالنسبة للعمر ومافيش سبب مرضى وحاولت تحسن ظروف التربية وعالجت البرد والكوكسيديا والكلوستريديا وحقنت اكتر من مرة واستخدمت منشطات نمو كتير وبردو مفيش فايدة
☝ يبقي حضرتك اكيد في الحالة دي بتشك ان الكتكوت او العلف هو السبب .... بس احيانا بتلاقى حد تاني منزل نفس الكتكوت ونفس العلف بس سحب العلف عنده والوزن احسن من عندك بكتير 🤔
يبقي السبب مش الكتكوت ولا العلف
امال اي السبب ؟
👈 في الحقيقة ان اول 72 الى 96 ساعة من عمر الكتاكيت مهمة جدا لشهية ونمو الكتاكيت وبتحدد مسار الدورة كلها من حيث النمو وسحب العلف
👈لان خلال الفترة دي لازم ينشط مركز الشهية في المخ ولو دا محصلش هتكون شهية الفراخ اقل وسحب علفها ووزنها قليل بالنسبة لعمرها طول الدورة مهما حاولت
طيب ننشط مركز الشهية ازاي ؟
اللي ينشط مركز الشهية هو امتلاء الحوصلة بالعلف ... يعني لازم 100% من الكتاكيت تكون حوصلتها مليانة بالعلف خلال اول 48 ساعة ( ودى بنعرفها باختبار الحوصلة اللى اتكلمنا عنه فى منشور سابق ) لان مركز الشهية بينشط بعد الامتلاء بالعلف ب 30 ساعة
واي اللي يخلي مركز الشهية مينشطتش ؟
ظروف التحضين الغير جيدة (زى الحرارة العالية او المنخفضة او التزاحم مثلا ) بتعمل اجهاد علي الكتكوت وبتنشط مركز الشبع وبتقلل نشاط مركز الشهية في المخ .
معنى كدة ان اى اجهاد على الطائر او تجويع فى العمر ده بيكون تاثيره ممتد مهما حاولت تصلح بعد كدة
☝ وعشان كدا لازم نهتم كويس بالتحضين وظروفه لان اي غلطة فيها بتكمل معاك طول الدورة وياريت نزود مساحة التعليف قدر الامكان ويفضل فرش ورق جرائد على 50 % من الارضية اثناء التحضين ووضع العلف عليها على شكل هرمى لتحفيز الطيور على تناول العلف مبكرا
إرسال تعليق